|
第1屆《東TOUCH》十大傑青選舉終於誕生！
先旨聲明，《東TOUCH》並非要同香港青年商會主辦的「十大傑出青年選舉」爭飯食，只是《東TOUCH》作為一本潮流雜誌，好應該表彰一下，在過去一年於不同領域上有傑出表現的年輕人（年紀是40歲以下），更希望各位讀者，在看過他們的成就後，能夠自我鞭策，奮發向上。
首屆《東TOUCH》傑青選舉都學特首，玩小圈子選舉，由東TOUCHers全體成員推選出來，期望下屆有你的參與，依家即刻同你公布10個得獎單位！
陳啟泰--主持、演員、歌手
數01年人氣飆升得最勁的電視藝員，非《百萬富翁》主持陳啟泰莫屬。自4月首播以來，《百》就為亞視打了不少勝仗，最高一次對撼港姐，收視高達39點；節目中陳啟泰的口頭禪「你咁肯定？」、「最後答案」、「50/50」等，更成為全港市民茶餘飯後的對話，陳啟泰締造嘅呢股《百萬》旋風，相信你都感受得到。
得獎反應：「30幾歲人攞傑青，都唔算好過分啫，每個人10年出現一次『傑青』，就不枉此生。」
得獎感受：「有獎攞當然開心啦，作為一個鼓勵同Bonus，但冇獎都要努力工作㗎。」
01傑出成就：「當然係成為《百萬富翁》嘅主持啦！大家諗起攞支票，就諗起陳啟泰，感覺好正。」
01難忘3件事：
「1.完成歌星夢，最近忙緊灌錄工作，明年年頭推出。
2.做咗7個多月《百萬》主持，其中一晚對撼港姐總決賽，攞到39點高收視打低埋友台，勁！
3.早前首個百萬富翁誕生，上埋港聞版頭條，好犀利。」
02大計：「嘗試做歌手，同時想參與多啲劇集同電影嘅演出，總之愈忙愈好。」
心目中傑青：「其實每個人積極上進，做好分內事，就算係洗碗阿嬸，都係『傑青』。」
文：林咏機、Lisa、歐陽有男、德仔同學、洪欣榮、珍妮花、金成、機師
攝：蕭志南、程文遠 |
