|
娛樂圈最近有唔少明星都分別以地獄式的減肥餐單瘦身，搞到坊間人人爭相仿效。
為咗證明呢幾套餐單有幾掂，同埋有冇副作用，我們今次就找來三位減肥真人來試試近期大熱的陳啟泰蔬菜湯、車婉婉的食肉減肥法和張柏芝的食菜餐單，試食一個禮拜。還有Q版DoDo來質疑每位藝人的減肥方法。
真人測試 陳啟泰金字塔式蔬菜湯
內容：每日只飲蔬菜湯。
煮法：將薯仔兩個、蔬菜半斤、魚肉或瘦肉三兩，加水同煲、走鹽。
分量：每日飲六至八碗，可連渣吃，少吃多餐。
運動：一個禮拜做3-4次gym。
菜單由來：陳啟泰揚言：「呢個餐單由我自己設計，不過太難食，呢個世界除咗我同我老婆之外，無人跟得到。只要跟得到，一定work，2至3個禮拜已經見效，而且包你唔肚餓，食一世都得。」話雖如此，但陳啟泰自己也停飲菜湯，因為「瘦過頭」喎！
瘦身結果：陳啟泰不願透露
減肥真人Youmie
職業：家庭主婦
身高：5呎1吋
磅數：116.5磅
腰圍：30吋半
第1回合 鬥難食
呢個回合我哋會就餐單食物嘅味道及飽肚程度，要減肥真人俾分，佢哋仲會講吓個餐單點難食法。
菜湯餐單好飽肚
難食指數：＊＊（以5粒＊為最難食）
這個餐單是否難食則見仁見智，但被陳啟泰稱為「好難食，無人跟得到」的菜湯餐單，對於Youmie來說則輕而易舉，「我唔覺得太難食喎，可能我鍾意食薯仔同椰菜，肚餓就食，反而覺得薯仔食得太多好滯，有時會食唔晒添。我平時都唔係食咁多嘢，如果係本來食好多嘢嘅男仔，突然間要淨飲湯可能就好難頂，不過我就一啲都唔覺餓。」
陳啟泰菜湯勝出！
DoDo姐：「陳啟泰，算你好彩，個菜湯咁難飲，難得Youmie唔嫌棄仲覺得飽肚，跟足一個禮拜。
「車小姐，你而家係減肥定係收買人命，食咁多肉嚟減肥，搞到完全去唔到廁所不特止，連杜錦倫營養導師都話有問題，因為積晒啲毒素喺個肚度，搞到消化不良，我好懷疑你究竟係故意製造便秘定係減肥。
「柏芝你呢套餐單，走油走鹽冇厘味道，美欣食一個禮拜都話難頂，真係好懷疑你係咪真係食咗3個月咁耐，定係傳聞話你靠食去水丸減磅至真呀？」
第2回合 鬥難跟
呢個回合各減肥真人會就材料難唔難預備、運動難唔難跟這兩點俾分數。
日日做運動好麻煩
難跟指數：＊＊（以5粒＊為最難跟）
Youmie係家庭主婦，唔使返工，所以唔使帶住個暖壺四圍騰，但係出街點算？「出街前飲一碗，返屋企再飲，所以出街都唔敢去太耐。加上剛生完BB兩個月，帶佢出街已經夠多嘢拎，仲點帶住壺湯？」
咁日日做運動呢？「好在我屋企有架健身單車，咁至可以一邊踩單車、一邊睇住BB同埋同隻狗狗玩吓，一日踩足半個鐘㗎。」
都係陳啟泰菜湯勝出！
DoDo大喝：「陳生，你以為個個都好似你咁，淨係星期六、日先至返工錄影，其他時間印印腳拍廣告㗎？點可以出親街都攞住壺湯飲6至8碗呀？
「車小姐，人哋去唔到廁所，個肚谷住，仲點做運動呀？你以為孕婦運動班呀？
「仲有柏芝你，個烚菜餐冇啲變化咁死板，仲影響埋美欣日常交際活動，幾乎連朋友都冇埋。呢個回合以無咁麻煩的陳啟菜湯餐勝出。」
第3回合 鬥營養
減肥餐大忌係唔夠營養，減到手軟腳軟冇精神一定捱唔耐，所以我哋搵咗營養導師杜錦倫評估每個餐單的營養價值。
菜湯只可以間中食
營養指數：＊＊＊＊（以5粒＊為最高營養）
杜錦倫認為這個菜湯營養比其他兩個餐單均衡，一日計約有1千卡路里。但杜生建議此餐單只宜一個禮拜食一至兩日來清腸胃。
菜湯亦無必要走鹽，因人體需要鹽分，做完運動流汗之後，更加需要補充，加少少鹽更佳。
陳啟泰你最醒！
DoDo話：「陳啟泰，你個餐單營養都算均衡。不過車小姐，你個餐單就啱啱相反，高卡路里、仲非常唔健康，一啲菜都唔食，搞到個人乾爭爭，用幾多錢嚟買護膚品都冇用。柏芝，點解你淨係食白烚菜，營養完全唔夠，仲要跑一個鐘頭步，暈咗都冇人孭得起你。咁唔健康，短期減到肥都唔靚，out！呢個回合都係陳啟泰贏。」
第4回合 鬥成效
經過咁多個回合之後，最關鍵當然係成效。我哋立即睇吓三位減肥真人響一禮拜之後有冇瘦到啦！
Youmie（瘦身後）
腰減1吋，體重不變
磅數：116.5磅
腰圍：29吋半
總結：
DoDo：「我對今次三個餐單真係非常失望，難食又無嘢食，營養唔夠，又減得唔多。Youmie每日飲陳啟泰的菜湯、踩半個鐘頭單車，體重郁都唔郁吓，只係腰減到1吋。試食肉減肥的Emma不瘦反肥咗磅半，仲要扭肚痛之後腰才減得半吋。減得最多算係美欣，佢食烚菜餐單，瘦咗2磅半，但我睇係因為佢每日跑步返工嘅功效大過營養不良嘅食菜餐單。
「喺三個都咁差嘅餐單裡面，首先被Out出局嘅係張柏芝嘅餐單，既難食又唔夠營養，而車婉婉你嘅餐單只係塞滿條腸，無咩用處。最後留低嘅係你陳啟泰，你嘅菜湯餐營養總算均衡，但又減到腰，所以最後只有你可以留低。」
最後陳啟泰菜湯勝出！
＊以上測試只屬個別例子，並不表示所有個案相同。
撰文：子 攝影：輝、強、DavidLai、俊、Alvin 鳴謝：營養導師杜錦倫 |
