|
「TVB」買下外國有獎問答節目《The Weakest Link》版權，重易名為《一筆out消》，用以對撼《百萬富翁》，兼請咗出名口齒伶俐嘅鄭裕玲主持，鐵定由8月20日起晚上8:30開始播出，最高獎金重高達港幣300萬！聽落咁吸引，係咪想知多啲？《便利》就請咗Do
Do姐親授參加《一筆》致勝之道，咪眨眼喇！
鄭裕玲致勝3錦囊
玩呢啲問答遊戲，參與同收穫都一樣重要，《一筆》嘅最高獎金有成300萬，點先可以盡擸？等Do
Do姐醒你3大錦囊啦！
錦囊 1：「乜都要知啲，因為問題嘅範圍廣泛，天文地理都涉及啲，知得唔夠全面就會蝕底嘞！」
錦囊 2：「唔好怕尷尬，記住，上得節目都係想攞獎金啫，緊張只會影響表現，冇表現先至係最尷尬！如果參賽者冇表現，我就會『寸』下佢㗎！」
錦囊 3：「記住bank（存）起啲獎金！每答啱一條問題，獎金就會遞增，但係如果冇bank起啲錢，就唔可以帶埋去下一回合，而且一答錯就要由零再開始。咁樣又點會攞得多錢吖？」
陳啟泰冇信心贏！
下個月中《百萬》就要同《一筆》正面交鋒，身為主持嘅陳啟泰，有冇信心撼贏？「冇！因為我冇諗過同Do
Do姐比較，我覺得做好自己個part就夠。其實我都想《一筆》快啲出街，我會睇下嘅，未睇過吖嘛！」
阿Ken好似好從容不迫咁噃，但「亞視」創作總監黎文卓就相對地嚴陣以待喇！「我哋諗咗好多方案打《一筆》，要過埋呢個禮拜先有最終決定，我哋預咗佢哋會以最強姿態出現，所以絕對唔放軟手腳！」
《一筆》想贏要等年尾？
鑑於《一筆Out消》呢個名惹來不少劣評，《便利》就請李丞責用姓名學角度預測下《一筆》能否贏《百萬》。佢話：「《一筆》全名有28畫（Out字計4畫），屬金；《百萬》就有43畫，屬火，火剋金，但係《一筆》由女性主持，劣勢會稍有好轉，開始時有機會同《百萬》打平手。農曆7月後對屬金同屬水嘅嘢有利，到時《一筆》會扭轉形勢反勝《百萬》，加上《百萬》到年尾時會後勁不繼，《一筆》勝算更高。」
《一筆》VS《百萬》調查
《便利》訪問咗40位觀眾，睇下佢哋鍾意《一筆》定係《百萬》多啲：
1. 你會揀參加《一筆》定《百萬》？
《百萬》60%
《一筆》40%
意見：「《一筆》獎金雖然有300萬，但係難度高過《百萬》咁多，都係玩《百萬》好啲！」
2. 你會睇《一筆》定《百萬》？
《一筆》70%
《百萬》30%
意見：「《一筆》新鮮感大啲，又有Do Do姐，咪捧下場囉！」
|
