|
亞視《百萬富翁》走勢凌厲，上周收視再升兩點，平均收視有
15 點，上周三最高收視更達 18 點（即 115
萬觀眾），是亞視近年難得的佳績，反而同時段播出的無線《全線大搜查》勁跌
3 點，平均收視只得 24
點，無線有見及此，進行救亡行動，據說與旅遊事務署合作搞《香港知多少》，力圖搶回高收視。另一邊廂的陳啟泰隨即成為亞視鎮台之寶，對於他創造佳績，他謙稱仍未算是成功的主持。
《百萬富翁》收視節節上升，無線上周同時段播出的《全線大搜查》雖然平均收視二十四點，但比《百萬富翁》只多出九點，不過已令無線急謀對策，據說與旅遊事務署合作搞《香港知多少》，力挽劣勢。
收視飆升錦上添花
陳啟泰欣聞此喜訊，仍謙虛地說：「其實收視幾多點在我嚟講冇乜所謂，而家我已經好滿意，再升可以話係錦上添花，出街人同我講個節目好睇已經好開心。如果你係尊重
AC Nielsen 調查報告，兩台收視冇得比，但係點解《全線大搜查》竟然話怕《百萬富翁》而去加料，我覺得可能睇到出面回響。喺無線做咗咁多年，曾參加過好幾套劇，譬如《大鬧廣昌隆》、《再見亦是老婆》，呢啲劇差唔多有四十點高收視，反應好到出街有很多人叫我劇中名，但係喺亞視拍《我和殭屍有個約會》，只得十三點收視，但係同樣都有咁好嘅觀眾反應俾到我，點解無線一個四十點劇集，會同亞視十三點劇集的回響咁相似呢？我唔敢話調查報告唔準確，不過令到我對呢個數字遊戲冇咁緊張。」
不贊成美女做布景板
一直外間有不少視評人對《百萬富翁》意見甚多，譬如能在節目中增添性感美女作活動布景板，相信可令節目吸引度大增，身為主持人的陳啟泰卻絕不認同，他說：「我哋睇過好多個國家嘅《百萬富翁》，包括英國、非洲同印度，唔多唔少覺得每一個國家《百萬富翁》都應該有唔同觀眾口味，但係節目形式真係要遷就到有整體性嘅改變，我覺得就唔需要加性感美女。」
他續說：「我睇過幾個國家《百萬富翁》，都見唔到報紙所講性感美女做布景板，至於香港會唔會跟，我本人絕對100%
反對，因為早排喺街拍外景，有幾個學生走埋嚟同我講佢好鍾意睇《百萬富翁》，我諗而家可以吸納到呢一班觀眾，亦都可以教育到學生或者市民，如果真係加插呢啲嘢落去，會令成個節目唔同晒。基本上呢個節目吸引觀眾嘅嘢，唔係花巧嘢，因為冇明星、唔會玩糟質亦都冇競技，完全係用腦答問題，若然出問題質素好，出到問題啲個個答案參賽者都覺得似嘅，呢樣先係個節目最主要做嘅嘢。」
承認未夠稱職
陳啟泰開始當《百萬富翁》主持時，受到不少批評，說他不夠稱職兼拖延節目時間，他雖然有解釋過，但也承認自己做得不好。
「初初做也知自己唔合格，而家過一個月，算係差少少，希望緊快合格，可以繼續進步。其實氣氛可以搞得再好，我最深刻係英國版《百萬富翁》主持，佢係我所見咁多個主持裡面最出色的一個，氣氛營造得唔錯，『拋』你又唔知真定假，喺適當時候會做或者講一啲好幽默嘅嘢，如果可以做到佢八成功力，我覺得自己已經成功。」
陳啟泰自覺《百萬富翁》為他帶挈不少，節目短短播出一個月內，他已被各大少媒體爭相邀約採訪，很多時也會圍繞《百萬富翁》或其他工作，很奇怪的是差不多每個訪問中，也會問及他在節目中是否刻意「拋窒」參賽者。
不可通水參賽者
陳啟泰說：「真係好多人問過我呢個問題，我亦答過好多次，我都唔知道真正答案，當然我本身識就例外，但係就算我識，但由於職責關係都唔可以通水。我問多幾次參賽者肯唔肯定答案，絕對唔係『拋』佢，只係我覺得參賽者要過幾關，咁辛苦先可以上到，唔好因為一時之快而錯失咗攞多啲獎金嘅機會，不過香港人係心急，所以有呢聲音係預左，但係我會堅持番節目本身嘅製作方向。」
一百萬係好多錢
雖然香港經濟市道低迷，但一百萬港幣可有不少用途，不過相比起英國及美國版的《百萬富翁》，以當地國家貨幣計算，似乎吸引力不大，念經濟系畢業的陳啟泰說：「其實有一百萬港幣都算好好，雖然英磅同美金一百萬同我哋差好幾倍，但係我哋香港只係有七百萬人，而美國有二億幾人，況且美版《百萬富翁》個版權可以賣去五十二個洲，我哋香港嘅廣告收益點都冇佢哋咁多啦！」
「執二攤」星運更佳
早前有報道《百萬富翁》主持一職，本打算找外援雷宇揚擔任，輾轉下才決定由陳啟泰孭飛，陳啟泰坦言亦有聽聞過這傳言，他說：「我都有聽過話本身係雷宇揚做《百萬富翁》主持，不過始終冇人證實過，但係我知公司有幾個選擇，直至今年二月公司已經同我講呢個節目係由我做。」
其實娛樂圈「執二攤」的情況會經常發生，還有不少藝人藉「執二攤」上位，星運更璀璨：
周潤發 李連杰 《臥虎藏龍》
章子怡 舒淇 《臥虎藏龍》
張曼玉 梅艷芳 《阮玲玉》
吳家麗 胡慧中 《梁祝》
金城武 吳奇隆 《墮落天使》
撰文》方希彤 攝影》鄧鴻欣 美術》Aggie |
